अधिकार आमचा न्युज नेटवर्क
संपादक गफ्फार शेख (मलिक)
उपसंपादक रोहित शिंदे
चाळीसगाव (प्रतिनिधी) – निसर्गाच्या एका झटक्यात शेतकऱ्यांची स्वप्ने कशी उद्ध्वस्त होतात, याचे जिवंत उदाहरण टाकळी परिसरात पाहायला मिळाले. काल दिनांक १९ मार्च रोजी रात्री सुमारे ९ वाजताच्या सुमारास आलेल्या अचानक वारा वादळाने कुसुमबाई अशोक सूर्यवंशी यांच्या शेतातील मक्का पिकावर अक्षरशः घाला घातला.
गट क्रमांक ४०६/२ मधील त्यांच्या शेतात उभे असलेले भरघोस मक्का पीक काढणीच्या उंबरठ्यावर होते. कष्टाने, आशेने आणि भविष्याच्या स्वप्नांनी जोपासलेले हे पीक काही क्षणातच वाऱ्याच्या तडाख्यात जमीनदोस्त झाले. आकाशात वादळ घोंगावत असताना शेतात उभे असलेले मका एकामागून एक कोसळत होते, आणि त्या प्रत्येक कोसळणाऱ्या कणसाबरोबर शेतकऱ्यांच्या आशाही कोलमडत होत्या.कुसुमबाई सूर्यवंशी यांनी मोठ्या कष्टाने हे पीक उभे केले होते. बियाणे, खते, औषधे, पाणी आणि दिवसरात्र केलेली मेहनत – या सगळ्यांचा आता एका क्षणात चुराडा झाला आहे. उभ्या पिकावर पाणी फिरल्याने त्यांच्या डोळ्यांसमोर अंधार पसरला आहे. “आता पुढे काय?” हा प्रश्न त्यांना सतावत आहे.
या नुकसानीमुळे केवळ आर्थिक फटका बसलेला नाही, तर मानसिक धक्का देखील मोठा आहे. शेतीवरच उदरनिर्वाह असलेल्या या कुटुंबासाठी हे नुकसान म्हणजे मोठा आघात ठरला आहे. कर्जाचे ओझे, घरखर्च आणि पुढील हंगामाची चिंता यामुळे कुटुंब चिंतेत सापडले आहे.
टाकळी परिसरातील इतर शेतकऱ्यांनाही या वादळाचा फटका बसल्याची माहिती समोर येत आहे. निसर्गाच्या अनिश्चित खेळामुळे शेतकरी दिवसेंदिवस अधिकच असुरक्षित होत चालले आहेत.सदर नुकसानीचा तात्काळ पंचनामा करून शासनाकडून मदत मिळावी, अशी आर्त मागणी कुसुमबाई सूर्यवंशी आणि इतर शेतकरी करत आहेत.
“निसर्गाच्या या अवकृपेने पुन्हा एकदा शेतकऱ्यांच्या जिव्हाळ्याच्या प्रश्नांकडे लक्ष वेधले असून, प्रशासनाने तातडीने मदतीचा हात पुढे करावा, अशी अपेक्षा व्यक्त होत आहे.
About The Author
