अधिकार आमचा न्युज नेटवर्क
संपादक गफ्फार शेख (मलिक)
उपसंपादक रोहित शिंदे
चाळीसगाव (प्रतिनिधी) : शहरातील धुळे रोडवरील डेराबर्डी भागात असलेल्या समर्थ पाव बेकरीमध्ये घुसून एका तरुणावर लोखंडी कोयत्याने सपासप वार करून गंभीर जखमी केल्याची घटना घडली. या प्रकरणी चाळीसगाव शहर पोलीस ठाण्यात दोघांविरुद्ध गुन्हा दाखल करण्यात आला आहे.
मिळालेल्या माहितीनुसार, अजय शिवाजी चव्हाण (वय २४) हा समर्थ पाव बेकरीमध्ये काम करत असताना ममराज हरीलाल जाधव व त्याचा एक अनोळखी साथीदार बेकरीत आले. जुन्या भांडणाची कुरापत काढून त्यांनी अजय याच्याशी शिवीगाळ केली. त्यानंतर दोघांनी मिळून कमरेला खोसलेला लोखंडी कोयता काढत अजयच्या चेहऱ्यावर, पाठीवर, हातावर आणि पायावर सपासप वार केले. या हल्ल्यात अजय गंभीर जखमी झाला असून मोठ्या प्रमाणात रक्तस्त्राव झाला.
घटनेवेळी बेकरीतील इतर कामगार मदतीसाठी धावले असता आरोपींनी त्यांनाही धमकावत, मध्ये पडल्यास गंभीर परिणाम भोगावे लागतील असा इशारा दिला. त्यानंतर दोघेही घटनास्थळावरून फरार झाले. जखमी अजय चव्हाण याला तातडीने उपचारासाठी रुग्णालयात दाखल करण्यात आले.
ही घटना ३ जून रोजी दुपारी सुमारे २.३० वाजेच्या सुमारास घडली. अजय चव्हाण यांनी दिलेल्या फिर्यादीवरून ममराज हरीलाल जाधव व त्याच्या अनोळखी साथीदाराविरुद्ध चाळीसगाव शहर पोलीस ठाण्यात भारतीय न्याय संहिता (बीएनएस) कलम 109, 352, 351(2) व 3(5) अन्वये गुन्हा दाखल करण्यात आला आहे. या घटनेचा पुढील तपास शहर पोलीस करीत आहेत.
About The Author
